“Suntsitzaileen ebanjelioak —eta sasi-politika infraestrategikoek— eragindako zinismoak lausotu ez duen herritar orok elkar ezagutzen du jendetzaren erdian, elkarren ispilu balira bezala”.
Gure Berriak
Harreman politikoetan parte hartzen duten oinarrizko elementuak dira subjektu politikoak. Subjektu politikoa beti da herri bat, herri subiranoa. Beste herri subiranoek kontuan hartzen duten zerbait. Munduan subjektu politikoa izateko, botere nahikoa izan eta erakutsi behar da. Subjektu politikoa eta herria uztarturik doazen kontzeptuak dira. Baina zer dira?
Herria elkar identifikatzen duen eta elkarrekin bizitzeko helburua duen gizatalde bat baino ez da. Talde horrek, gainera, gaitasuna du bere helburuak lortzeko. Herriarekin, beraz, tupust egingo dugu, helburuak egitate bihurtzeko gaitasuna ere baduelako. Indarra esaten dio honek, boterea horrek, ahala hark; gaitasuna, azken finean. Parean duenaren erabakimena mugatzerainoko gaitasuna daukan herri hori da subjektu politikoa. Gaurko munduan, estatuak dira subjektu politikoak.
