http://paperekoa.berria.info/iritzia/2013-07-13/005/004/mikel_garciari_pako_aristiren_harira.htm
2013-07-13
ZUZENDARIARI
Mikel Garciari, Pako Aristiren harira
JOSEBA UNZALU AURREKOETXEA GASTEIZ.
Hernaniko Mikel Graciak asteazkenean Zuzendariari atalean idatzitako artikuluari erantzuteko asmoz idatzi ditut lerro hauek.
Inperio guztiak inperialismoaren bidez nagusitu dira, hau da, indarkeria militar/polizialaren bidez, terrorismoa praktikatuz, alegia, eta behin hori burutu ondoren, inperioaren kudeaketa «leun» politikoa dator. Inperialismotik inperiora bitarteko bidea, bilakaera jarrai baten bidez gertatzen da, eta gizarte menperatuen akulturazioa dakar. Gizabanakoak, familiak, komunitateak inperialismoak goraipatutako balioak bereganatzen ditu emeki-emeki eta mendez mende.
Inperioak bere «akordioa/legea» inposatzen du, dugun nortasun berria «eskuratzen» edo «onartzen» dugulako, eta indarrez ezarritako legeak, nola ez, hilzorian dugun nortasun ukatuaren gainetik daudelako.
Horrela sortzen dira baztertuak, konspiratzaileak, asozialak, borrokazaleak, eta baita ere «beltzak», «indioak»… eta Pako Aristi bezalako astintzaileak, noski.
Eskubideez ari garenean pentsatu dugu noizbait zenbat aldiz arbuiatu diren, lehen eta orain, euskaldunen eskubideak? Gaur ere agerian ikus daiteke eskubide horien urraketa Nafarroan eta Iparraldean, «inperio demokratikoen» eskutik.
Mikel, hauxe esango nizuke: kolonoak ez dira zertan kanpotik etorritakoak izan. Euskal Herrian jaiotako asko kolono gisa jokatzen dute etengabe, inperio zanpatzailea distiragarri egiten.
2013-07-10
ZUZENDARIARI
Pako Aristiren artikuluaren harira
MIKEL GARCIA. HERNANI.
Honako gutun hau, zure egunkariak ni bezalakoei falta izan dion errespetuaz idazten dizut.
Eztabaida dabil sare sozialetan xenofoboa eta arrazista ez ote zen Pako Aristik pasa den igandean zure egunkariko orrietan argitaratutako artikulua. Nire aita Gaztelako herrietan jaio zen, handik Euskal Herrira etorri zen, bizi beharrak eraginda. Ez daki euskaraz. Nor da Aristi nire aitari kolono deitzeko? Nire aitak Euskal Herrian sortu ninduen, herri honen etorkizunarekiko kezka piztu eta irakatsi zidan, baina ez ikuspegi nazionalari dagokionez bakarrik, baita sozial eta kulturalean ere (Aristi jaunarentzat bigarren mailakoa dirudiena).
Ni bezalakoentzat, Aristiren artikulua mingarria da. Eta nahi dugun bezala bizitzeko eta izateko errespetuaren kontrakoa. Niretzat, nabarmen, eskubide urraketa bat dago artikulu hori argitaratzea erabakita, BERRIAk hala ikusi ez zuen arren, nire identitatea bera iraintzen eta gutxiesten duelako. Nik pertsona bezala ditudan eskubideak urratzen ditu, eta horrek, egunkari honen ildo editorialean oinarrizkoa izan beharko luke, eta horren adibide da ez lukeela antzeko iritzirik onartuko genero edo sexu askatasuna urratuko balu. Aristik arrazoitu baino gehiago iraindu egiten du.
Aristi jaunak bere izen onarekin nahi duena egin dezake, baina besterik da zuk zure egunkariko ateak zabaltzea halako artikuluei, zure egunkariaren eta egunkariko langileen izen eta lan ona eta ildo editoriala kolokan jartzen dituzulako.